អត្ថបទសង្ខេប
រយៈពេល៧៧ឆ្នាំហើយបើគិតមកដល់ឆ្នាំ២០២៦នេះ ដែលទឹកដីកម្ពុជាក្រោម ស្ថិតក្រោមការគ្រប់គ្រងរបស់វៀតណាម។ អតីតខេត្តខ្មែរទាំង២១នេះ ត្រូវបារាំងកាត់ឲ្យវៀតណាមនៅថ្ងៃទី០៤ មិថុនា ឆ្នាំ១៩៤៩។
បារាំងបានកាត់ទឹកដីកម្ពុជាក្រោមឲ្យវៀតណាម តាមរយៈសន្ធិសញ្ញាឆ្នេរយ៉ាឡុង នៅថ្ងៃទី០៤ ខែមិថុនា ឆ្នាំ១៩៤៩។ មូលហេតុដែលនាំបាត់បង់កម្ពុជាក្រោម ដោយរម្លឹកពីការធ្លាក់ចុះដុនដាប របស់អំណាចខ្មែរនៅក្នុងរជ្ជកាលរបស់ព្រះបាទជ័យជេដ្ឋាទី២ ដោយសារសម្ពាធប្រទេសជិតខាងពីរ គឺសៀម និងយួន។ ការគាបសង្គត់ពីសៀម បានធ្វើឲ្យព្រះអង្គចាប់ដៃជាមួយវៀតណាម ដើម្បីទប់ជាមួយសៀម។ «នេះជានយោបាយរំដោះខ្លួន ដើម្បីការពារខ្លួន ប៉ុន្តែ នយោបាយរបស់ព្រះអង្គ បានផ្តល់ឥទ្ធិពផលអាក្រក់ដល់អ្នកជំនាន់ក្រោយ»។
ដើម្បីភ្ជាប់ទំនាក់ទនងជាមួយវៀតណាម ក្រៅពីព្រមទទួលយកបុត្រីរបស់ស្តេចវៀតណាម មកធ្វើជាមហេសី ស្តេចជ័យជេដ្ឋាទី២ បានអនុញ្ញាតឲ្យប្រជាជនវៀតណាម រស់នៅលើដីសណ្តទន្លេមេគង្គនៅកម្ពុជាក្រោម ដោយបង្គាប់ឲ្យបង់ពន្ធឲ្យរដ្ឋាភិបាលខ្មែរដូចប្រជាជនខ្មែរដែរ។
បន្ទាប់ពីការអនុអញ្ញាតរបស់ព្រះអង្គមក ជនជាតិវៀតណាម បានហូរចូលមកកម្ពុជាក្រោម កាន់តែច្រើនឡើងៗ។ មូលហេតុដែលព្រះអង្គយល់ព្រមឲ្យប្រជាជនវៀតណាមមករស់នៅលើដីខ្មែរយ៉ាងដូច្នេះពីព្រោះ ព្រះអង្គត្រូវការពឹងវៀតណាម ដើម្បីប្រឈមមុខ ជាមួយកងទ័ពសៀម ដែលកំពុងគាបសង្កត់ខ្មែរ។ ប្រសិនព្រះអង្គដឹងថា ថ្ងៃក្រោយទៅ ទឹកដីកម្ពុជាក្រោម ក្លាយជារបស់វៀតណាម ព្រះអង្គក៏មិនអនុញ្ញាតនោះទេ។
ដោយឡែក នៅក្នុងរាជព្រះបាទអង្គឌួង ព្រះអង្គបានបញ្ជូនកងទ័ពទៅគ្រប់គ្រងកម្ពុជាក្រោម និងបណ្តេញជនជាតិវៀតណាម ប៉ុន្តែ គួរឲ្យសោកស្តាយ ព្រះអង្គបានចូលទិវង្គត។ ក្រោយមកបារាំងបានមកដាក់អាណានិគមលើកម្ពុជា និងបានកាត់ដីកម្ពុជាក្រោម ឲ្យវៀតណាមជាផ្លូវការនៅឆ្នាំ១៩៤៩។
មូលហេតុដែលបារាំងកាត់ដីកម្ពុជាក្រោមឲ្យវៀតណាម គឺដើម្បីការលើកទឹកចិត្តកងទ័ពវៀតណាមខាងត្បូង ដើម្បីពង្រឹងកម្លាំងទ័ពប្រឆាំងចលនាវៀតណាមកុម្មុយនីស្តខាងជើង ដែលដឹកនាំដោយ លោក ហូ ជីមិញ។
បើទោះបីតាមច្បាប់អន្តរជាតិ កម្ពុជាមិនអាចទាមទារកម្ពុជាក្រោមមកវិញក៏ដោយ ប៉ុន្តែសូមឱ្យខ្មែរក្រោមទាំងអស់ កុំឲ្យអស់សង្ឃឹម ហើយត្រូវតែពង្រឹងវប្បធម៌ ប្រពៃណី និងអត្តសញ្ញាណរបស់ខ្មែរ។
————————
ចែករំលែកព័ត៌មាន និងចំណេះដឹងនៅទីនេះ៖ https://bnctrust.blogspot.com/
————————
Telegram: https://t.me/bnccambo